منی پور فسادات مودی سرکار کی نااہلی کا منہ بولتا ثبوت

مودی سرکار گزشتہ ایک دہائی سے بھارت پر مسلسل قابض ہونے کے باوجود ملک کے مسائل حل کرنے سے قاصر ہے۔ انتہا پسند مودی کے ہندوتوا ایجنڈے کے فروغ نے بھارت کو فسادات کی آگ میں جھونک دیا ہے۔ منی پور فسادات پر مودی سرکار نے مکمل چپ سادھے ہوئی ہے جس پر عالمی میڈیا بھی سیخ پا ہو گیا۔

رواں ہفتے ایمنسٹی انٹرنیشنل نے منی پور فسادات پر تشویش کا اظہار کرتے ہوئے ایک مفصل رپورٹ شائع کی ۔ مئی 2023 سے شروع ہونے والے منی پور فسادات کے بعد اب تک حالات کشیدہ ہیں۔ منی پور میں کوکی اور میتی قبائل کے مابین فسادات میں خون کی ہولی کھیلی جا رہی ہے جبکہ مودی کے کان پر جوں تک نہیں رینگ رہی۔ ریاست میں انسانی حقوق کے تحفظ کو ناگزیر قرار دیتے ہوئے ایمنسٹی انٹرنیشنل نے اپنی رپورٹ میں کہا کہ منی پور فسادات کو 400 سے زائد دن گزر چکے ہیں مگر حکمران جماعت ابھی تک ان فسادات کو ختم کرنے میں مکمل طور پر ناکام رہی ہے ۔ تین مئی 2023 سے جاری میتی اور کوکی قبائل کے مابین فسادات میں اب تک 200 سے زائد افراد ہلاک جبکہ 60 ہزار سے زائد بے گھر ہو چکے ہیں۔

عوام کی حفاظت داؤ پر لگنے اور مجرمان کے خلاف احتساب میں ریاستی ناکامی کے باعث منی پور کی عوام شدید خوف اور بے چینی کا شکار ہیں۔ منی پور میں پولیس مجرمان کی پشت پناہی کرتی ہے جبکہ معروف صحافی اور تجزیہ کار بھی منی پور فسادات پر مجرمانہ خاموشی اختیار کیے ہوئے ہیں۔ رپورٹ میں منی پور کے متاثرہ عوام کے لیے فوری امدادی کیمپس کی ضرورت پر زور دیا گیا۔ رپورٹ اور شکایات درج کروانے کے باوجود مقامی پولیس ہماری کوئی مدد نہیں کرتی بلکہ خاموش تماشائی بنی رہتی ہے۔
منی پور میں مظلوم عوام پر شدید تشدد کر کے ان کے گھروں، کاروباری مراکز اور عبادت گاہوں کو جلایا گیا مگر حکام نے ان لوگوں کے خلاف کریک ڈاؤن کیا جنہوں نے اس ظلم کے خلاف بولنے کی جرات کی۔

ستمبر 2023 میں بھارتی پولیس نے منی پور میں تشدد پر ایڈیٹرز گلڈ آف انڈیا فیکٹ فائنڈنگ ٹیم کے تین صحافیوں کے خلاف سوشل میڈیا پر منی پور مظالم کے خلاف آواز اٹھانے کے الزام پر ایف آئی آر درج کروائی۔ ایمنسٹی انٹرنیشنل نے منی پور کے امدادی کیمپس میں دورے کیے جہاں متاثرہ عوام کا کہنا تھا کہ مودی سرکار کی جانب سے ان کی مالی امداد کے وعدے اب تک پورے نہیں کئے گئے۔ منی پور کے متاثرین کو بے یارو مددگار چھوڑ کر مودی سرکار اپنے سیاسی کریئر کو مضبوط بنانے کے لیے غیر ملکی بے مقصد دورے کرنے میں مصروف ہے۔ ایمنسٹی انٹرنیشنل نے مودی سرکار سے مطالبہ کیا کہ وہ منی پور میں انسانی حقوق کی خلاف ورزیوں کا نوٹس لیتے ہوئے متاثرین کی بحالی کے لیے عملی اقدامات کرے۔ سوال یہ پیدا ہوتا ہے کہ کیا مودی سرکار عالمی دباؤ میں آ کر منی پور کی عوام کو انصاف فراہم کرے گی یا اپنی روایتی ہٹ دھرمی برقرار رکھے گی؟